យល់ដឹងប៉ុន្មានចំណុចនេះ ក្រែងលអាចសង្គ្រោះទូរសព្ទដែលធ្លាក់ចូលទឹកបាន
បច្ចុប្បន្ននេះមានការផលិតនូវទូរសព្ទថ្មីដែលអាចធន់នឹងទឹកបាន ប៉ុន្តែសម្រាប់ទូរសព្ទដែលមិនអាចធន់នឹងទឹកបានត្រូវប្រុងប្រយ័ត្នជានិច្ច ព្រោះបើធ្លាក់ចូលទឹកទូរសព្ទអាចនឹងប្រើការលែងកើតតែម្ដង។
ដូចនេះបើអ្នកធ្លោយធ្វើឲ្យទូរសព្ទធ្លាក់ចូលទឹក អ្នកអាចអនុវត្តតាមការណែនាំដូចខាងក្រោម៖
ជាដំបូងត្រូវយល់ដឹងពីចំណុចដែលអ្នកមិនគួរធ្វើជាមុនសិន៖
មិនត្រូវបើកទូរសព្ទ ឬប្រើប្រាស់បន្ទាប់ពីធ្លាក់ចូលទឹកនោះទេ
មិនត្រូវចុចប៊ូតុងអ្វីទាំងអស់
មិនត្រូវ ក្រឡុកឬទះទូរសព្ទដើម្បីឲ្យទឹកចេញនោះទេ
– មិនត្រូវផ្លុំទូរសព្ទ ព្រោះអាចធ្វើឲ្យទឹកចូលទៅកន្លែងដែលមិនមានជ្រាបទឹកបាន
– មិនត្រូវយកខ្យល់ក្ដៅមកផ្លុំទូរសព្ទ ដូចជាម៉ាស៊ីនផ្លុំសម្ងួតជាដើម
បន្ទាប់មកត្រូវអនុវត្តវិធីដូចខាងក្រោម៖
១. បិទទូរសព្ទរបស់អ្នក រួចទុកចោលមួយភ្លែត បន្ទាប់មកដកស៊ីមកាត និង មេម៉ូរីចេញពីក្នុងទូរសព្ទ
ព្រមទាំងដកថ្មចេញផងប្រសិនបើអាច ព្រោះចំពោះទូរសព្ទមួយចំនួនគឺមិនអាចដកថ្មចេញបាននោះទេ
២. យកកន្សែង ឬក្រណាត់មកជូតកន្លែងដែលមានទឹកដោយថ្នមៗ ធ្វើយ៉ាងណាកុំឲ្យទឹកនោះខ្ទាតទៅប៉ះផ្នែកផ្សេងទៀត
៣. ប្រសិនបើនៅត្រង់ចន្លោះប្រហោងអ្នកមិនអាចជូតបានទេនោះ អ្នកអាចប្រើប្រាស់ម៉ាស៊ីនប៉ូម ដើម្បីប៉ូមទឹកចេញពីចន្លោះប្រហោងនោះដោយប្រុងប្រយ័ត្ន
៤. កប់ទូរសព្ទចូលទៅក្នុងធុងអង្ករ ព្រោះអង្កអាចធ្វើការស្រូបជាតិទឹកបានយ៉ាងល្អបំផុត
៥. ទុកទូរសព្ទរបស់អ្នកចោលរយៈពេល២ទៅ៣ថ្ងៃដើម្បីឲ្យវាស្ងួតបានល្អ។ ផុតរយៈពេលនោះហើយអ្នកអាចសាកល្បងដាក់ថ្មចូលទៅក្នុងទូរសព្ទវិញ រួចបើកវា។ បន្ទាប់មកសាកចាក់បទចម្រៀងដើម្បីធ្វើការពិនិត្យរន្ធបំពងសំឡេង និងពិនិត្យមើល Touchscreen របស់ទូរសព្ទផងថាដើរឬក៏អត់
៦. ក្នុងករណីដែលទូរសព្ទបើកមិនចេញទេ អ្នកគួរធ្វើការសាកថ្មទូរសព្ទជាមុនក្រែងលអាចជួយបាន ប៉ុន្តែបើនៅតែបើកមិនចេញអាចទុកថ្មនោះឲ្យស្ងួតយូរបន្តិច ឬប្ដូរថ្មថ្មី។
៧. ប្រសិនបើទូរសព្ទអ្នកអាចបើកឡើងដូចធម្មតានោះ អ្នកត្រូវធ្វើការសង្កេតជាបន្តក្នុងរយៈពេល ២ ទៅ៣ថ្ងៃ ថាតើមានអ្វីដែលខុសពីប្រក្រតី។
*****ត្រូវចងចាំថាយកទូរសព្ទចេញពីក្នុងទឹកឲ្យបានលឿនជាទីបំផុត ព្រោះបើទុកយូរទឹកនឹងអាចជ្រាបចូលគ្រឿងក្នុងរបស់ម៉ាស៊ីន ធ្វើឲ្យខូចខាតកាន់តែធ្ងន់ធ្ងរ៕
-ចុចអាន៖ មានតែ Wi-Fi ក៏អាចមើលធ្លុះជញ្ជាំងបានដែរ!
ប្រែសម្រួល៖ ហៃ សុខហេង
ប្រភព៖ androidpit